Ilustrasi: Kolonialisme Menindas Ras Melanesia
Puisi : Orang Papua Jua Manusia
Dong pu kurang apa lai
seng kasi apa lai buat katong
apa lai yang katong blom ambil
atau katong rampas
gunung katong gali
hutan katong babat
tanah adat katong curi
laut katong cemari
udara tong jadikan bisnis
papeda su hampir punah
dong pu keaslian jua su ikut punah
sejarah katong putar bale
dong percaya kalo katong putar lidah
nama bae katong hina
paksa dong teriak NKRI harga mati
tapi katong tutup dong pu suara sampe mati
katong su kasi dong apa
setau beta
katong hanya kasi dengar dong bunyi senjata
dong pu nyawa katong kasi hilang
tubuh katong injak
harga diri jua katong injak
nyong kulut hitam pu bae kurang dimana lai
nona manis rambut kariting pu hati seng bae deng kurang dimana lai
katong seng ada hati ka
ato katong pu hati ada tapi su mati
ato ada tapi katong seng pake
jang hanya karna dong pu kulit hitam
katong pu kulit putih
katong anggap diri malaikat
katong panggil dong setan
seng
orang papua ju manusia
bukan jua monyet
dong pu darah merah
dong pu tulang putih
kalo seng sama deng katong pu darah deng tulang
berarti katong zombie
ato lintah darat penghisap tubuh manusia
jang bilang katong cinta papua
beta seng percaya
karna katong hanya mo cari dong pu emas
tapi seng anggap dong ana mas
jang bilang katong sayang papua
beta seng mau dengar
kalo katong hanya butuh dong pu kekayaan alam
tapi seng dengar dong pu jeritan
katong su tinggal di dong pu bumi
dong kasi katong tanah
katong kasi kembali dong mayat
dong kasi mata air
katong kasi air mata
dong kasi papeda
katong kasi peluru deng senjata
dong kasi sirih pinang
katong kasi tambang beracun
dong kasi makan penuh perut
katong kasi dong melarat
bilang katong mau kasi dong hidop sejahtera
tapi katong seng kasi dong kesehatan
yang katong kasi
kemisikinan
kelaparan
kehausan
penindasan
deng bermacam-macam penderitaan
peringatan buat katong
simpan dalam dada
tempel di ingatan
katong jang lupa
katong su buat genosaida
katong jang lupa
katong mustinya menolak lupa
orang papua jua manusia
kalo seng mau ingat
jang kasi tumpah dong pu dara
jang kasi patah dong pu tulang
jang kasi banjir dong pu pipi
tapi kasi dong kebebasan
bernyanyi
menari
bersuara
merayakan apa yang dong ingi rayakasa
#PAPUANLIVESMATTER
Salam Sadar
0 Post a Comment:
Posting Komentar